Na Cibercaixa Mallos estamos a desenvolver actividades nas que podemos expresarnos oralmente, compartir ideas e aprender uns dos outros/as. Como moitos de vós non tedes deberes neste momento, esta é unha oportunidade perfecta para mellorar a nosa expresión oral en galego, xa que nos permite comunicar mellor os nosos pensamentos e sentimentos. Ao mesmo tempo, tamén nos axuda a reforzar a cohesión do grupo, traballando xuntos/as, respectando as opinións dos demais e fortalecendo a colaboración.
Por iso, aproveitaremos este tempo da tarde dedicado ao apoio escolar para traballar estas habilidades de forma práctica e divertida.
O primeiro que faremos é ver este vídeo xuntos/as. Estade moi atentos/as e pensade con atención sobre o que vedes, porque é fundamental que saquedes algunha conclusión e esteades preparados/as para compartir as vosas ideas.
Lembrade, aquí todas as ideas contan: o importante é reflexionar, aprender e participar activamente.
🤔 Que son os prexuízos?
Os prexuízos son ideas que pensamos dunha persoa antes de coñecela de verdade.
Xulgamos só pola súa aparencia, como fala ou de onde vén, sen saber quen é nin como se comporta.
🧠 Exemplo:
“Ese neno leva lentes, seguro que é un empollón”.
Pero pode que lle guste xogar ao fútbol, bailar ou contar chistes.
🎭 Que son os estereotipos?
Os estereotipos son frases ou crenzas que repetimos sobre un grupo de persoas, como se todas foran iguais, cando en realidade cada persoa é diferente.
🧠 Exemplo:
“Todas as nenas xogan con bonecas” ou “todos os nenos son fortes”.
Non é certo: hai nenas que adoran o fútbol e nenos que disfrutan pintando ou bailando.
🚫Por que os prexuízos e os estereotipos poden facer dano?
Tanto os prexuízos como os estereotipos son inxustos porque nos fan xulgar ás persoas antes de coñecelas de verdade.
Se pensamos que alguén é dunha maneira só pola súa aparencia ou polo grupo ao que pertence, podemos:
-
Tratar mal a esa persoa sen ningún motivo.
-
Perder a oportunidade de coñecer xente estupenda.
-
Repetir ideas falsas que fan dano e limitan a liberdade das persoas.
👉 Por iso, é mellor coñecer, escoitar e respectar antes de sacar conclusións.
🧠 Preguntas de comprensión (Que pasou na historia?)
-
Que quería facer a anciá ao principio da curta?
-
Que actitude tiña o adolescente cando apareceu?
-
Por que a anciá pensou que o mozo era maleducado?
-
Que fixo a anciá cando o adolescente colleu unha galleta?
-
Que descubrimos ao final sobre as galletas?
-
Como reaccionou a anciá ao decatarse do erro?
💭 Preguntas de reflexión (Que opinas ti?)
-
Que pensaches do adolescente ao principio da curta? E ao final?
-
Pasouche algunha vez que pensaches mal de alguén e logo decatáchesche de que estabas equivocada/o?
-
Cres que é xusto xulgar a unha persoa só por como se ve ou como actúa nun momento?
-
Como te sentirías se alguén te xulgase sen coñecerte?
❤️ Preguntas para traballar empatía e valores
-
Que poderías ter feito ti se foses a anciá?
-
E se foses o adolescente?
-
Que podemos aprender desta curta sobre os prexuízos?
-
Por que é importante darlles unha oportunidade ás demais persoas antes de xulgar?
-
Que valores che parece que mostra a curta? (Exemplo: respecto, paciencia, empatía…)
🎨 Actividades complementarias
1.- Fai unha lista de maneiras nas que podemos evitar ter prexuízos e estereotipos. Aquí tes dous exemplos:
-
Pensar como nos sentiríamos se nos xulgasen sen coñecernos.
-
🧠 Exemplo: Se alguén se ri de ti por levar lentes, como te sentirías? Non fagas o mesmo cos demais.
-
-
Evitar repetir frases ou ideas que fan dano.
-
Non usar estereotipos nin bromas que ridiculicen a ninguén.
-
🧠 Exemplo: Non dicir “as persoas maiores non entenden de móbiles”, porque non é certo e pode ferir.
-
2.- Reflexiona sobre estes conceptos
-
Que significa idadismo?
-
Que significa adultismo?
