O globo de Betanzos

O texto que vos propoño ten o obxectivo de practicar a oralidade en galego, como pedistes, pero tamén me parece interesante que coñezades diferentes manifestacións culturais de Galicia. 

É unha forma tamén de achegarvos á nosa contorna máis próxima, a través da realidade histórica, a sociedade e a cultura da nosa contorna. 

 Antes do COVID, en 2019, puiden estar nesta curiosa festa que como ides poder comprobar empezou a celebrarse fai un par de séculos e non parou de facerse ata que chegou o COVID. Preparados? Só temos que desprazarnos 60 quilómetros para chegar a Betanzos e coñecer unha das súas festas.

O globo de Betanzos

O 29 de maio de 1814 foi a primeira vez que un globo aerostático se lanzou na vila de Betanzos, en honor do retornado rei Fernando VII. Desde entón, a vila continuou elevando aeróstatos en ocasións puntuais e especiais: festas, visitas reais... Pero non sería ata 1875 cando, da man de don Claudino Pita Pandelo, comezou a elevarse o monumental globo de Betanzos anualmente nas festas de mediados de agosto.

As súas medidas (25 metros de altura por 50 de circunferencia) fan del o globo de papel máis grande do mundo. Si, si, leu vostede ben: está confeccionado en papel, recortado en láminas de 50 centímetros e pegado con engrudo de fariña de centeo. Ademais, sen lugar a dúbidas, é o que máis persoas reúne no momento de levantar o voo: na betanceira Praza do Campo reúnense cada ano máis de 50 000 persoas, dispostas a ver como o xigante de papel se eleva sobre as súas cabezas, e a ler os chistes que adornan os seus 16 cuarteiróns.

Pero para os betanceiros, ver a elevación do globo non é un simple espectáculo de masas: é máis ca iso, é un sentimento inexplicable, unha mestura de emocións indescritible que fai da noite do 16 de agosto un dos acontecementos máis sinalados do calendario.

http://www.geocities.com/betanzosvirtual/globo.html

O globo de Betanzos, una ficha interactiva de sara_prof

liveworksheets.com